Sonn matgleði á háskúlanum

Einki eitur at svitsa ella brasa, men hvat er at braisera? Hvussu sukursalta vit? Hvat ger man við fenniku ella toskarogn? Hvussu samanseta vit eina matarskrá? Og nær er búffurin medium rare? Tað kann verða trupult at finna íblástur til gerandisdøgurðan. Hvar kunnu vit leita?

Á hesum skeiðnum fer Gutti Winther at læra okkum at taka tey góðu valini í køkinum. Vit fara at læra grundleggjandi tilgerðir í matgerðini. Ætlanin við skeiðnum er, at heimakokkarnir skulu verða teir hvassastu knívarnir í skuffuni eftir einari viku á landbúnaðaroynni.

Hetta skeiðið er til tín, sum vil læra at gera mat uttan uppskriftir. Til tín, sum vil menna tínar førleikar at samanseta rávørur til ein góðan rætt, og ymiskar rættir til eina samanhangandi matskrá. Og til tín, sum vil gera matgerðina stuttligari, fríari og meira spennandi.

Vit fara m.a. at:

• Læra um grundleggjandi tilgerðir

• Læra um rávørur

• Læra um at samanseta matarskráir

• Læra at taka árstíðirnar inn í køkin

• Fáa íblástur

• Fáa ymisk hent ráð og snildir

• Og so sjálvandi at gera mat og at eta mat

Lærari: Gutti Winther

Dato: 9. - 13. mars 2020

Tíðspunkt: Skúladagarnir eru frá 9 - 16. Fyrsta skeiðsdagin byrja vit tó ikki fyrr enn kl 10.30, og fríggjadag hava vit frí kl 14.00. Les meira um gerandisdagin á háskúlanum á síðuni ‘Um skúlan’

Støði: Grundskeið

Longd: Fimm dagar

Næmingatal: Í mesta lagi 16

Upptøkutreytir: Ongar. Øll vaksin eru vælkomin.

Prísur: 1500 kr (við í prísinum er skeiðsluttøka og vistarhald. Les um vistarhald á Mat & Moldmentanarháskúlanum her).

Tilmelding fer fram við at senda ein teldupost til tilmelding@moldmentan.fo.